پیاز ٹماٹر مہنگے ہون تے اسیں رولا پاندے آں، پر زمیناں تے مکاناں دیاں قیمتاں ودھن تے خوشیاں کیوں مناندے آں؟
جدوں پیاز تے ٹماٹراں دیاں قیمتاں چند روپے ودھ جاندیاں نیں، تے اسیں فوراً مہنگائی دا رونا رونا شروع کر دیندے آں۔ میڈیا تے سارے معاشرے وچ اک طوفان کھڑا ہو جاندا اے۔ پر جدوں زمیناں، رہائشی پلاٹاں تے مکاناں دیاں قیمتاں راتوں رات دگنیاں یا تگنیاں ہو جاندیاں نیں، تے اسیں خوشیاں کیوں مناندے آں؟حقیقت ایہ اے کہ جائیداد دیاں ودھدیاں قیمتاں توں کروڑاں لوک براہِ راست متاثر ہوندے نیں، خاص طور تے اوہ لوک جنہاں کول نہ اپنا گھر اے، نہ کوئی وادھو پلاٹ یا جائیداد اے، تے نہ ہی جائیداد مہنگی ہون نال مالی فائدہ چکن دا کوئی موقع اے۔
آخر ایہ کیوں اے کہ روزمرہ دیاں ضروری چیزاں دی مہنگائی سانوں پریشان کردی اے، جدکہ زمیناں تے مکاناں دیاں ودھدیاں قیمتاں نوں اسیں خوشحالی، کامیابی تے معاشی ترقی دی نشانی سمجھ بیٹھدے آں؟
ساڈے ایس متضاد رویے دے پچھے کئی اہم نفسیاتی، سماجی تے معاشی وجوہات کم کردیاں نیں۔ آؤ سمجھنے دی کوشش کریے کہ نفسیات تے معاشیات وچ ایس سوچ نوں کس طرح بیان کیتا جاندا اے۔
مشہور امریکی ماہرِ معاشیات ارونگ فشر (Irving Fisher) نے 1928ء وچ اپنی کتاب The Money Illusion وچ ایس نفسیاتی تے معاشی رویے دا تفصیلی جائزہ لیا سی۔ اوہناں نے واضح کیتا سی کہ عام لوک اکثر پیسے دی ظاہری قدر (Nominal Value) نوں اوہدی حقیقی قوتِ خرید (Real Purchasing Power) سمجھ بیٹھدے نیں تے مہنگائی دے اثرات نوں نظرانداز کر دیندے نیں۔ معاشیات وچ ایس رجحان نوں مالیاتی وہم (Money Illusion) آکھیا جاندا اے۔
ارونگ فشر توں پہلاں وی کئی معاشی مفکراں نے ایس تصور بارے اپنے اپنے انداز وچ گل کیتی سی۔ اپنے قارئین دی دلچسپی لئی اسیں ایس رجحان دے پچھے موجود اہم نفسیاتی تے معاشی وجوہات دا مختصر جائزہ پیش کر رہے آں۔
1. دولت ہون دا وہم (Money Illusion)
رویہ جاتی معاشیات (Behavioral Economics) وچ ایس رجحان نوں Money Illusion یعنی دولت ہون دا وہم آکھیا جاندا اے۔ انسان اکثر اپنی جائیداد دی حقیقی قوتِ خرید نوں سمجھے بغیر صرف اوہدی ظاہری عددی قیمت وچ اضافے نوں اپنی خوشحالی سمجھ لیندا اے۔
فرض کرو کسے بندے دا لاہور یا کسے ہور وڈے شہر وچ اک مکان اے، جس دی قیمت 50 لکھ روپے توں ودھ کے اک کروڑ روپے ہو گئی اے۔
کاغذاں وچ اوہ بندہ دگنا امیر ہو گیا اے۔ پر جے اوسے شہر وچ باقی سارے مکاناں، زمیناں تے ضروری چیزاں دیاں قیمتاں وی اوسے حساب نال ودھ گئیاں نیں، تے اوہ بندہ اج وی اوس رقم نال اوہی معیارِ زندگی حاصل کر سکدا اے، جیڑا پہلاں 50 لکھ روپے وچ حاصل کر سکدا سی۔
ایہو جیہی صورت وچ اوہدی اصل دولت (Real Wealth) تقریباً اوتھے دی اوتھے رہندی اے تے اوہدی حقیقی قوتِ خرید (Real Purchasing Power) وچ کوئی اضافہ نہیں ہوندا۔
پر انسانی دماغ اک کروڑ روپے دے وڈے عدد نوں ویکھ کے خوشی تے مالی کامیابی دا احساس کرنا شروع کر دیندا اے۔
رویہ جاتی معاشیات وچ ایہ اک تسلیم شدہ رجحان اے کہ انسان اکثر اپنی حقیقی معاشی حالت دا جائزہ لین دی بجائے پیسے یا جائیداد دی ظاہری قیمت وچ اضافے نوں زیادہ اہمیت دیندا اے۔
ایس طرح بندہ اپنے آپ نوں پہلے نالوں زیادہ امیر سمجھدا اے، حالانکہ حقیقت وچ اوہدی مالی حالت یا قوتِ خرید وچ کوئی خاص بہتری نہیں آئی ہوندی۔
2. جائیداد نہ ہون دے باوجود قیمتاں ودھن تے لوک خوش کیوں ہوندے نیں؟
Aspirational Bias and Aspirational Identification
نفسیات وچ ایس رویے دی اک ہور وضاحت Aspirational Identification یعنی خواہشاں تے امیراں نال ذہنی وابستگی دے تصور نال کیتی جا سکدی اے۔
جنہاں لوکاں کول اپنی کوئی جائیداد نہیں ہوندی، اوہ وی زمیناں تے مکاناں دیاں قیمتاں ودھن تے خوش ہو سکدے نیں، کیونکہ ساڈے معاشرے وچ جائیداد دا مالک ہونا کامیابی، مالی تحفظ، سماجی عزت تے ذاتی ترقی دی وڈی نشانی سمجھیا جاندا اے۔
بہت سارے لوک ایس امید تے بیٹھے ہوندے نیں کہ شاید کل نوں اوہ وی جائیداد دے بازار دا حصہ بن جان گے تے قیمتاں ودھن دا فائدہ چک سکنگے۔
اجتماعی سطح تے وی لوک اکثر اپنے آپ نوں امیر طبقے تے کامیابی دی نمائندگی کرن والے رجحانات نال جوڑنا پسند کردے نیں۔
ایس وجہ توں جائیداد دیاں ودھدیاں قیمتاں نوں اجتماعی خوشحالی تے معاشی ترقی دی نشانی سمجھ لیا جاندا اے، بھاویں انہاں ودھدیاں قیمتاں دی وجہ توں عام بندے لئی اپنا گھر خریدنا ہور وی مشکل ہوندا جاوے۔
ایہ اک نفسیاتی تضاد اے، جس وچ لوک اوس رجحان تے خوشیاں مناندے نیں جیڑا آخرکار اوہناں دے اپنے گھر خریدن دے موقعے وی گھٹا سکدا اے۔
3. قیاس آرائی تے راتوں رات امیر ہون دا خواب
Speculative Fever and Gambling Psychology
ساڈے معاشرے وچ زمین ہن صرف رہن لئی گھر بناؤن یا کاروبار کرن دی جگہ نہیں رہی، بلکہ ایہ اک وڈی قیاس آرائی والی سرمایہ کاری دی منڈی بن چکی اے، جتھے جلدی توں جلدی منافع کمان دی امید لوکاں دے فیصلیاں تے اثر پاندی اے۔
جدوں کوئی بندہ ویکھدا اے کہ اوہدے گوانڈھی دے پلاٹ دی قیمت بہت زیادہ ودھ گئی اے، تے اوہدے اندر اک نفسیاتی ڈر پیدا ہوندا اے، جس نوں FOMO یعنی Fear of Missing Out آکھیا جاندا اے۔
ایس دا مطلب اے کہ کتے کوئی فائدے والا موقع ہاتھوں نہ نکل جاوے۔
ایہ ڈر بندے نوں مجبور کردا اے کہ اوہ قیمتاں ہور ودھن توں پہلاں جائیداد دی خرید و فروخت وچ شامل ہو جاوے۔
لوک سوچن لگ پیندے نیں کہ جے اج زمیناں دیاں قیمتاں ودھ رہیاں نیں، تے کل نوں شاید اوہ وی ایس توں فائدہ چک سکنگے۔
ایہ دراصل اجتماعی قیاس آرائی (Collective Speculation) اے، جتھے ہر بندہ اپنے آپ نوں مستقبل وچ منافع کمان والا سمجھدا اے، بھاویں جائیداد دی مہنگائی دے مجموعی معاشی اثرات اوہدے اپنے مالی مفادات دے خلاف ہی کیوں نہ ہون۔
ایہو جیہے حالات وچ جائیداد دی سرمایہ کاری راہیں امیر ہون دی امید، گھر خریدن دی استطاعت، رہائش دی سہولت تے زندگی دے ودھدے اخراجات ورگے اہم مسئلیاں نوں پچھے چھڈ دیندی اے۔
آخرکار بہت سارے لوک جائیداد دیاں قیمتاں ودھن تے خوشیاں مناندے رہندے نیں، جدکہ اوہی قیمتاں اوہناں دی اپنی زندگی وچ مالی مشکلات پیدا کر رہیاں ہوندیاں نیں۔
4. روزمرہ دی مہنگائی تے جائیداد دی مہنگائی وچ فرق
Visible Inflation vs. Structural Inflation
سبزیاں، آٹا تے ہور ضروری چیزاں دیاں قیمتاں دا تعلق براہِ راست ساڈی روزمرہ زندگی تے بنیادی ضرورتاں نال اے۔
جدوں انہاں چیزاں دیاں قیمتاں ودھدیاں نیں، تے لوکاں نوں فوراً مالی دباؤ محسوس ہوندا اے، کیونکہ اوہناں نوں ایہ چیزاں باقاعدگی نال خریدنیاں پیندیاں نیں۔
ایس لئی کھان پین دیاں چیزاں مہنگیاں ہون تے فوراً غصہ، عوامی تنقید تے پریشانی سامنے آ جاندی اے۔
ایس دے برعکس، زمیناں تے مکاناں دیاں قیمتاں ودھن نوں لوک بالکل وکھرے انداز نال ویکھدے نیں۔
پہلی نظر وچ جائیداد مہنگی ہونا اک چنگی معاشی خبر لگدی اے، جیویں ایہ خوشحالی، مالی ترقی تے دولت وچ اضافے دی نشانی ہووے۔
پر بہت سارے لوک ایہ گل سمجھ نہیں سکدے کہ زمیناں تے مکاناں دیاں ودھدیاں قیمتاں پوری معیشت وچ ہور کئی اخراجات ودھن دا سبب بن سکدیاں نیں۔
مہنگی زمین تے کمرشل جائیداد دی وجہ توں گھراں تے دکاناں دے کرائے ودھ سکدے نیں، جس نال عام گھراں تے کاروباراں تے مالی بوجھ ہور زیادہ ہو جاندا اے۔
ایہ ودھدے اخراجات آخرکار بچیاں دی تعلیم، علاج معالجے، گروسری، ضروری چیزاں، کاروباری سہولتاں تے کاروبار چلاؤن دی مجموعی لاگت نوں وی متاثر کر سکدے نیں۔
جدوں کاروبار کرن والیاں نوں دکاناں، دفتراں تے ہور جائیداداں دے زیادہ کرائے دین پین، تے اوہ انہاں اضافی اخراجات دا کچھ حصہ اشیا تے خدمات دیاں قیمتاں ودھا کے صارفین توں وصول کر سکدے نیں۔
ایس دا مطلب اے کہ جائیداد مہنگی ہون دے اثرات صرف زمین یا مکان خریدن تے ویچن والیاں تک محدود نہیں رہندے۔
ایہ اثرات پورے معاشرے تک پہنچ سکدے نیں، حتیٰ کہ اوہناں لوکاں تک وی جنہاں دا جائیداد دی منڈی نال کوئی براہِ راست تعلق نہیں ہوندا۔
اس دے باوجود بہت سارے لوک جائیداد دیاں ودھدیاں قیمتاں نوں خوشحالی دی شروعات سمجھ کے خوشیاں مناندے رہندے نیں، بغیر ایہ سمجھے کہ ایہو جیہے رجحانات مستقبل وچ اوہناں دیاں اپنی معاشی مشکلات وی ودھا سکدے نیں۔
جیڑی گل جائیداد دے مالکان لئی مالی کامیابی دی کہانی لگدی اے، اوہی کروڑاں عام لوکاں لئی رہائش حاصل کرن دا اک سنگین بحران بن سکدی اے۔
اوہ لوک جنہاں دی خواہش صرف ایہ اے کہ اوہناں دے سر تے اپنی چھت ہووے، انہاں لئی زمیناں تے مکاناں دیاں بے قابو ودھدیاں قیمتاں زندگی دا سب توں وڈا معاشی مسئلہ بن سکدیاں نیں۔
جائیداد دیاں قیمتاں وچ بے قابو اضافے دے وسیع معاشی نتیجیاں نوں سمجھے بغیر خوشیاں منا کے اسیں انجانے وچ اوہناں معاشی حالتاں نوں ہلاشیری دے رہے ہوندے آں، جیڑے آخرکار ساڈی اپنی مالی حالت نوں نقصان پہنچا سکدے نیں۔
اک طرح نال اسیں آپ ای اوس اگ نوں ہوا دے رہے ہوندے آں، جیڑی آخرکار ساڈے اپنے گھراں تک وی پہنچ سکدی اے۔
زمینی حقائق: رئیل اسٹیٹ دا کالم