Punjab Province

قصور: ری نیوز پاکستان
ڈپٹی کمشنر محمد آصف رضا کی زیر صدارت ضلع میں جاری بیوٹیفکیشن منصوبوں کے حوالے سے ایک اجلاس منعقد ہوا جس میں شہر کی خوبصورتی اور شہری سہولیات کی بہتری سے متعلق مختلف اقدامات کا جائزہ لیا گیا۔
اجلاس میں پارکس کی بحالی، شجرکاری اور شہری علاقوں میں صفائی و تزئین و آرائش کے منصوبوں پر پیش رفت کا تفصیلی جائزہ لیا گیا۔ اس موقع پر متعلقہ محکموں کے افسران کو ہدایت کی گئی کہ جاری ترقیاتی منصوبوں کی رفتار تیز کی جائے اور شہری ماحول کو بہتر بنانے کیلئے مؤثر اقدامات یقینی بنائے جائیں۔
ڈپٹی کمشنر نے کہا کہ حکومت پنجاب کے وژن کے مطابق شہری علاقوں میں بیوٹیفکیشن اور عوامی سہولیات کے منصوبوں کو ترجیحی بنیادوں پر مکمل کیا جا رہا ہے تاکہ ضلع میں صاف ستھرا اور خوشگوار ماحول فراہم کیا جا سکے۔
اجلاس میں متعلقہ محکموں کے افسران نے جاری منصوبوں کے حوالے سے بریفنگ بھی دی جبکہ مختلف علاقوں میں جاری تزئین و آرائش اور پارکس کی بہتری کے اقدامات پر بھی تبادلہ خیال کیا گیا۔

لاہور : ری نیوز پاکستان
حکومت پنجاب نے روایتی سکیورٹی اسٹامپ پیپر کے استعمال کو ختم کرتے ہوئے اسٹامپنگ نظام میں بڑے پیمانے پر ڈیجیٹل اصلاحات متعارف کرا دی ہیں۔ اس اقدام کے تحت جائیداد اور قانونی دستاویزات کے لیے استعمال ہونے والے اسٹامپ پیپرز کا اجرا اب مکمل طور پر آن لائن نظام کے ذریعے ممکن ہو گا۔
بورڈ آف ریونیو پنجاب کے تحت متعارف کرائے گئے نئے ای-اسٹامپنگ نظام کے ذریعے شہری اسٹامپ ڈیوٹی کی ادائیگی اور اسٹامپ کے اجرا کا عمل آن لائن مکمل کر سکیں گے، جس کے بعد بینکوں یا مجاز فروخت کنندگان سے روایتی اسٹامپ پیپر خریدنے کی ضرورت نہیں رہے گی۔
نئے نظام کے تحت شہری سرکاری پورٹل کے ذریعے گھر بیٹھے ای-اسٹامپ حاصل کر سکیں گے، جبکہ موبائل ایپ کے ذریعے ادائیگی کے بعد ون ٹائم پاس ورڈ (او ٹی پی) کی تصدیق مکمل ہونے پر ای-اسٹامپ فوری طور پر جاری کر دیا جائے گا۔
حکومت کے مطابق ای-اسٹامپنگ نظام کے نفاذ سے اسٹامپ پیپرز کی فراہمی کے عمل میں شفافیت آئے گی، جعلی اسٹامپ پیپرز کے استعمال کی روک تھام ممکن ہوگی اور شہریوں کو جائیداد، معاہدات اور دیگر قانونی دستاویزات کی تکمیل میں سہولت فراہم ہوگی۔

لاہور: ری نیوز پاکستان
برصغیر کے قدیم ترین اشاعتی اداروں میں شمار ہونے والا 155 سالہ قدیم گورنمنٹ پرنٹنگ پریس بند کر دیا گیا جبکہ اس کی تاریخی عمارت بھی مسمار کر دی گئی، جس پر مختلف شہری اور ثقافتی حلقوں نے افسوس اور تشویش کا اظہار کیا ہے۔
میڈیا رپورٹس کے مطابق یہ سرکاری پرنٹنگ پریس 1867 میں لاہور میں بنک آف بنگال کی عمارت میں قائم کیا گیا تھا، جو بعد ازاں 1914 میں ہرن روڈ پر تعمیر کی گئی نئی عمارت میں منتقل کر دیا گیا۔ یہ ادارہ برطانوی دور سے لے کر قیام پاکستان اور بعد ازاں بھی سرکاری دستاویزات، گزٹ اور دیگر اہم سرکاری اشاعتوں کی طباعت کا اہم مرکز رہا۔
اطلاعات کے مطابق چند ہفتے قبل تک اس تاریخی پریس میں طباعتی سرگرمیاں جاری تھیں، تاہم بعد ازاں اسے مکمل طور پر بند کر دیا گیا جبکہ 1914 میں تعمیر ہونے والی عمارت کو بھی زمین بوس کر دیا گیا۔
تاریخی ورثے سے وابستہ ماہرین کا کہنا ہے کہ اس نوعیت کی قدیم عمارات شہر کے تاریخی تشخص اور ثقافتی ورثے کا حصہ ہوتی ہیں، جن کے تحفظ کے لیے مؤثر پالیسی کی ضرورت ہے۔ ماہرین کے مطابق اس طرح کے ادارے نہ صرف صحافتی و سرکاری اشاعتوں کی تاریخ کے امین ہوتے ہیں بلکہ شہری تاریخ اور تعمیراتی ورثے کی اہم علامت بھی سمجھے جاتے ہیں۔
شہری حلقوں کا کہنا ہے کہ ایسے تاریخی مقامات کی جگہ مستقبل میں کسی بھی نئی تعمیر یا ترقیاتی منصوبے سے قبل ان کے تاریخی پس منظر اور ثقافتی اہمیت کو مدنظر رکھا جانا چاہیے تاکہ شہر کے قدیم تشخص اور ورثے کو محفوظ رکھا جا سکے۔